کراچی: (ویب ڈیسک) شہر قائد کے میں تیز بارش اور آندھی سے پارہ گر گیا ہے تاہم تیز آندھی اور تیز بارش کی وجہ سے شہریوں کو مشکلات کا سامنا ہے۔ شیر شاہ کے علاقے میں دیوار گرنے سے ایک بچہ جاں بحق ہو گیا۔
آئی آئی چندریگر روڈ اور کیماڑی سمیت کئی مقامات پر تیز بارش ہو رہی ہے۔ سرجانی، نیو کراچی اور نارتھ کراچی میں تیز آندھی کی وجہ سے ٹریفک کی روانی متاثر ہے۔ لسبیلہ، حب، گڈانی اور گردو نواح میں بھی رم جھم کی اطلاعات ہیں۔
بارش ہوتے ہی مختلف علاقوں میں بجلی غائب ہو چکی ہے۔ پی آئی بی، سہراب گوٹھ، صفورا، گلشن اقبال، گلستان جوہر، پی ای سی ایچ ، صدر، آئی آئی چندریگر روڈ، شاہ فیصل، نیو کراچی، سرجانی، ایف بی ایریا، ناظم آباد، اورنگی ٹاون میں بھی بجلی معطل ہے۔
کے الیکٹرک کی جانب سے عوام سے اپیل کی گئی ہے کہ وہ شدید موسمی اثرات میں احتیاط برتیں۔ عوام بجلی کے تار، پی ایم ٹی اور انفراسٹرکچر سے دور رہیں۔ کچھ علاقوں میں بجلی کی فراہمی متاثر ہے۔ بجلی کے تاروں پر درخت گرنے سے پاور انفراسٹرکچر متاثر اور تار ٹوٹ سکتے ہیں۔ کنڈے والے علاقوں میں احتیاطی طور پر کچھ مقامات پر عارضی بجلی بند کی جا سکتی ہے۔
ڈائریکٹر محکمہ موسمیات سردار سرفراز کے مطابق سائیکلون سے متعلق الرٹ میں آندھی کا امکان ظاہر کیا گیا تھا، دو تین گھنٹے میں کراچی سے بادل گزر جائیں گے ۔
سردار سرفراز کا کہنا ہےکہ کراچی میں گرمی کی شدت میں کل سے کمی آجائے گی،کراچی میں تیز بارش کا کوئی امکان نہیں، سمندری طوفان اور شہر میں گرمی کی شدت کے باعث بادل بنے ہیں۔
واضح رہے کہ سمندری طوفان ’تاؤتے‘ کے باعث محکمہ مومسیات کی جانب سے کراچی سمیت سندھ بھر میں بارشوں کی پیش گوئی کی گئی تھی تاہم طوفان کا رخ بھارت کی جانب مڑ جانے کے بعد محکمہ موسمیات نے کہا تھا کہ پاکستان کی ساحلی پٹی کو طوفان سے کوئی خطرہ نہیں۔
